Skip navigation.
कृण्वन्तो विश्वमार्यम्

Rishiyon Ka Sandesh---By Ach.Gyaneshwer Ji Arya,

1. Vishyon ko bhogkar,indriyon ki trishna ko samapt karne wala tumhara vichar aisa hai jaisa ki aag ko bujhane ke liye usme ghee dalna.

2.Yah manna tumhara sabse bara agyaan hai ki "mein kabhi nahi marunga,yah sharir bahut pavitra hai,vishya bhogon mein purn aur sthaie sukh hai tatha yah deh hi aatma hai.

3.Tumhare man mein achhe ya bure vichar apne aap nahi aate.en vicharon ko tum apni echha se hi utpann karte ho kyonki man to jar vastu hai,uska chalak(driver) aatma hai.

4.Kisi ke achhe ya bure karm ka phal tatkaal prapt hote na dekh kar tum yah mat vicharo ki in karmon ka phal aage nahi milega.Karm phal se koi bach nahi sakta,kyonki ishwer sarvvyapak ,sarvgya tatha nyayakari hai.

5. Sansaar(Prakriti),sansaar ko bhogne wala (Jiv),Tatha sansaar ko banane wale (Ishwer) ke vastvik swarup ko jaankar hi tumhare samast dukh,bhay,chintayen samapt ho sakti hein aur koi upaya nahi hai.

6"Manushya janm Ishwer prapti ke liye mila hai"es mukhya lakshya ko chorkar anya kisi bhi karya ko prathmikta mat do,nahi to tumhara jivan chandan ke van ko koyala banakar nast karne ke samaan hai.

7. Tumhare jiwan ki saflta to kaam,krodh,lobh,moh,aahnkaar aadi avidya ke kusanskaron ko nast karne mein hai.Yahi samast dukhon se chutne ka shresth upaya hai.

8.Jab tak tum sansaar ke sukhon ke pichhe chipe huve dukhon ko samajh nahi loge,tab tak vyragya utpann nahi hoga ,bina vyragya ke chanchal man akagra nahi hoga, akagrta ke bina Ishwer ka darshan nahi hoga,bina Ishwer darshan ke agyaan ka naash nahi hoga aur agyaan ke naash huve bina dukhon ki samapti aur purn tatha sthaie sukh(mukti) ki prapti nahi hogi.

9.Tum es satya ko samjh lo ki agyani manushya hi jar vastuon (bhumi, bhawan,sona,chandi aadi) tatha chetan vastuon (pati,patni,putra,mitra aadi) ko apni aatma ka ek bhag maankar inki vridhi hone par prasann tatha nahi hone par dukhi hota hai.

10.Tumhare lohe rupi man ko,vishyabhog rupi chumbak sada apni or khinchte hein.Gyani manushya vishya bhogon se hone wali haniyon ka anumaan laga kar in mein aasakt nahi hote,kintu agyani manushya vishya bhogon mein phans kar nast ho jaate hein.

11. mahan gyaan ,bal,anand aadi gunon ka bhandaar,jo anadi kaal se tumhare saath hai,na kabhi vah alag huva naa hoga,usi sansaar ke banane wale,palan karne wale,sabke rakshak nirakaar Ishwer ki stuti,prarthna,upasana tum manushon ko sada karni chahiye.

Sabhaar:- "Kriyatmak Yogabhyaas" By Ach.Gyeneshwerarya, Darshan Yog vidyalya Rojad,Gujrat